ممبئی: بھارتی پریمیئر لیگ (IPL) کی معروف ٹیم راجستھان رائلز کی ملکیت میں بڑی تبدیلی ہوگئی، ٹیم اور اس سے وابستہ دو دیگر فرنچائزز کی مجموعی ڈیل تقریباً 1.65 ارب ڈالر یعنی لگ بھگ 15 ہزار 600 کروڑ بھارتی روپے میں ہوئی ہے۔

راجستھان رائلز کی یہ بڑی ڈیل بھارت کے معروف ارب پتی لکشمی متل اور آدر پوناؤالا سے منسلک گروپ نے کی ہے۔ معاہدے کی خاص بات یہ ہے کہ صرف IPL کی راجستھان رائلز ہی نہیں بلکہ جنوبی افریقہ کی Paarl Royals اور کیریبین پریمیئر لیگ کی Barbados Royals بھی اس لین دین کا حصہ ہیں۔

معاہدے کے مطابق لکشمی متل کا خاندان تقریباً 75 فیصد حصہ رکھے گا، جبکہ آدر پوناؤالا کے پاس تقریباً 18 فیصد ملکیت ہوگی۔ موجودہ سرمایہ کاروں، جن میں منوج بادلے بھی شامل ہیں، کے پاس تقریباً 7 فیصد حصہ برقرار رہے گا۔

تقریباً 1.65 ارب ڈالر کی مالیت نے راجستھان رائلز کو کھیلوں کی دنیا کی انتہائی قیمتی فرنچائزز میں نمایاں کردیا ہے۔ اس معاہدے کا اعلان مئی 2026 میں کیا گیا تھا، جبکہ بھارت کے Competition Commission of India (CCI) نے 17 ستمبر 2026 کو راجستھان رائلز، Paarl Royals اور Barbados Royals کے حصول کی منظوری دے دی۔

یعنی اب راجستھان رائلز صرف ایک IPL ٹیم نہیں رہی بلکہ اس کے گرد ایک بڑا عالمی کرکٹ فرنچائز نیٹ ورک بھی تشکیل پا چکا ہے، جس میں بھارت، جنوبی افریقہ اور کیریبین کی تین بڑی T20 لیگز شامل ہیں۔

15 ہزار 600 کروڑ روپے کی یہ ڈیل اس بات کا واضح اشارہ ہے کہ عالمی کھیلوں کی مارکیٹ میں IPL فرنچائزز کی قدر کس حد تک بڑھ چکی ہے۔