دھروو راٹھی گرفتار
بھارت کے دارالحکومت نئی دہلی میں جنتر منتر پر احتجاج روکنے کے لیے پولیس نے کارروائی کرتے ہوئے
کاکروچ جنتا پارٹی کے بانی ابھیجیت دیپکے، پارٹی رہنماؤں سوروو داس اور آشوتوش رانکا سمیت متعدد مظاہرین کو حراست میں لے لیا۔ حراست میں لیے جانے والوں میں معروف یوٹیوبر دھروو راٹھی کا نام بھی شامل ہے۔
میڈیا رپورٹس کے مطابق کاکروچ جنتا پارٹی کے کارکن چیف الیکشن کمشنر گیانیش کمار سے استعفے کا مطالبہ کر رہے تھے۔ مظاہرین نے الزام عائد کیا کہ ووٹر فہرستوں میں تبدیلیوں کے ذریعے بھارتی وزیراعظم نریندر مودی کی جماعت بھارتیہ جنتا پارٹی (بی جے پی) کو فائدہ پہنچانے کی کوشش کی جا رہی ہے۔
کاکروچ جنتا پارٹی کے رہنماؤں اور کارکنوں کی جانب سے انتخابی عمل پر اٹھائے گئے اعتراضات ایسے وقت میں سامنے آئے ہیں جب بھارت میں انتخابی فہرستوں کی نظرثانی اور ووٹروں کے اندراج سے متعلق معاملات پر سیاسی بحث جاری ہے۔ تاہم ووٹر فہرستوں میں مبینہ تبدیلیوں کے ذریعے بی جے پی کو فائدہ پہنچانے کا الزام مظاہرین کا دعویٰ ہے۔
بھارت میں اس سے قبل امتحانی پرچوں کے مبینہ لیک ہونے کے معاملے پر بھی طلبہ نے احتجاج کیا تھا۔ ان واقعات نے امتحانی نظام کی شفافیت اور متعلقہ حکام کی ذمہ داریوں سے متعلق سوالات کو جنم دیا تھا۔
نئی دہلی میں تازہ احتجاج کے بعد حراست میں لیے گئے افراد کی تعداد اور ان کی رہائی سے متعلق مزید تفصیلات سامنے آنے کا انتظار ہے۔
