Fake US postage stamps fraud
ملزم فہیم اکرم پر 51 لاکھ سے زائد جعلی ڈاک ٹکٹ فروخت کرنے کا الزام، امریکی پوسٹل سروس کو 12 کروڑ 60 لاکھ ڈالر نقصان پہنچانے کا دعویٰ
لاہور کی مقامی عدالت نے جعلی امریکی ڈاک ٹکٹوں کی آن لائن فروخت کے ذریعے مبینہ طور پر 35 ارب روپے کا فراڈ کرنے کے مقدمے میں ملزم فہیم اکرم کا 5 روزہ جسمانی ریمانڈ منظور کرتے ہوئے اسے نیشنل سائبر کرائم انویسٹی گیشن ایجنسی (این سی سی آئی اے) کے حوالے کر دیا۔
ضلع کچہری لاہور میں جوڈیشل مجسٹریٹ نعیم وٹو کے روبرو این سی سی آئی اے نے ملزم فہیم اکرم کو پیش کیا۔ تفتیشی افسر نے عدالت کو بتایا کہ ملزم اگست 2023 سے ایک جعلی ویب سائٹ چلا رہا تھا، جس کے ذریعے 50 لاکھ سے زائد جعلی امریکی ڈاک ٹکٹ فروخت کیے گئے۔
تفتیشی افسر کے مطابق مبینہ فراڈ نیٹ ورک کے لیے خاندان کے 16 بینک اکاؤنٹس بھی استعمال کیے گئے۔ این سی سی آئی اے نے عدالت سے ملزم کا 30 روزہ جسمانی ریمانڈ دینے کی استدعا کی، تاہم عدالت نے 5 روزہ ریمانڈ منظور کرتے ہوئے ملزم کو 26 اکتوبر کو دوبارہ پیش کرنے کا حکم دیا۔
امریکا میں بھی ملزم کے خلاف فرد جرم عائد
رپورٹ کے مطابق گزشتہ ماہ کے آخر میں امریکی ریاست فلوریڈا میں فہیم اکرم کے خلاف امریکی پوسٹل سروس کو 12 کروڑ 60 لاکھ ڈالر، یعنی تقریباً 35 ارب روپے، کا نقصان پہنچانے کے الزام میں فرد جرم عائد کی گئی تھی۔
امریکی اٹارنی کے دفتر کی ویب سائٹ کے مطابق ملزم مبینہ طور پر ایک ایسی ویب سائٹ چلا رہا تھا جہاں ڈاک کے وزن یا منزل سے قطع نظر ہر ٹکٹ کی قیمت 2 ڈالر رکھی گئی تھی۔ یہ قیمت امریکی پوسٹل سروس کے اصل ڈاک ٹکٹ کی قیمت سے کم تھی۔
امریکی حکام کے مطابق اس ویب سائٹ کے ذریعے تقریباً 51 لاکھ جعلی ڈاک ٹکٹ فروخت کیے گئے، جنہیں سامان کی ترسیل کے لیے استعمال کیا گیا۔
ہزاروں افراد نے جعلی ویب سائٹ سے ٹکٹ خریدے
امریکی حکام کی تفتیش کے مطابق تقریباً 5 ہزار 200 افراد نے اپنے سامان کی ترسیل کے لیے مذکورہ ویب سائٹ سے ڈاک ٹکٹ خریدے۔ حکام کا دعویٰ ہے کہ اس مبینہ فراڈ کے باعث امریکی پوسٹل سروس کو 12 کروڑ 60 لاکھ ڈالر کا نقصان پہنچا۔
گرفتاری میں مدد پر ایک لاکھ ڈالر انعام
امریکی پوسٹل انسپیکشن سروس نے ملزم کی گرفتاری سے متعلق معلومات فراہم کرنے والے شخص کے لیے ایک لاکھ امریکی ڈالر انعام کا اعلان بھی کیا تھا۔
امریکی حکام نے اس معاملے پر مؤقف اختیار کیا تھا کہ امریکی پوسٹل سروس سے فراڈ کرنے والوں کو تلاش کرکے انصاف کے کٹہرے میں لایا جائے گا، چاہے وہ امریکا سے باہر ہی کیوں نہ ہوں۔
واضح رہے کہ ملزم کے خلاف بیان کردہ الزامات تفتیشی حکام اور استغاثہ سے منسوب ہیں۔ عدالت میں جرم ثابت ہونے تک ملزم کو قانون کے مطابق بے گناہ تصور کیا جاتا ہے۔
مزید خبریں پڑھنے کے لیے یہاں کلک کریں۔
گوگل کلاؤڈ میں بجلی کی بندش، برطانیہ کے بینک متاثر
Fake US postage stamps fraudFake US postage stamps fraud
