کراچی: پاکستان کرکٹ ٹیم میں اہم تبدیلیوں کی اطلاعات سامنے آئی ہیں، جہاں ٹی20 ٹیم کی قیادت اور اسکواڈ میں بڑی تبدیلیاں متوقع ہیں۔
ذرائع کے مطابق سلمان علی آغا کو ٹی20 اسکواڈ سے ڈراپ کرنے کے ساتھ ساتھ ان کی کپتانی بھی ختم کرنے کا فیصلہ کیا گیا ہے۔ وہ ٹیسٹ ٹیم کے بعد اب ٹی20 اسکواڈ کا بھی حصہ نہیں ہوں گے، تاہم ون ڈے ٹیم میں شامل رہیں گے۔
ٹی20 ٹیم کی نئی قیادت کے لیے صاحبزادہ فرحان اور شاداب خان کے نام زیرِ غور ہیں اور دونوں کے درمیان مقابلہ جاری ہے۔
ذرائع کا کہنا ہے کہ حارث رؤف کے بعد شاہین آفریدی کو بھی ٹی20 اسکواڈ سے باہر رکھنے کا فیصلہ کیا گیا ہے۔ شاہین آفریدی پاکستان کی جانب سے 136 جبکہ حارث رؤف 133 وکٹیں حاصل کرچکے ہیں۔
دوسری جانب ایجبسٹن ٹیسٹ میں شاندار کارکردگی دکھانے والے رضا اللہ کے ٹی20 اور ون ڈے اسکواڈ میں شامل ہونے کے امکانات بھی مضبوط بتائے جا رہے ہیں۔
ذرائع کے مطابق شاہین آفریدی ون ڈے ٹیم کی قیادت بدستور جاری رکھیں گے، جبکہ ٹیسٹ کپتان بابر اعظم ٹی20 اور ون ڈے اسکواڈ کا حصہ ہوں گے۔
پاکستان اور سری لنکا کے درمیان تین ٹی20 میچز 9 سے 13 اکتوبر تک راولپنڈی میں کھیلے جائیں گے۔
اس کے بعد 18 سے 31 اکتوبر تک راولپنڈی اور لاہور میں تین ملکی ون ڈے ٹورنامنٹ ہوگا، جس میں میزبان پاکستان کے علاوہ انگلینڈ اور سری لنکا کی ٹیمیں شرکت کریں گی۔
پاکستان کرکٹ ٹیم کے حوالے سے سامنے آنے والی ان تبدیلیوں کو حتمی شکل دینے کے بعد اسکواڈ اور قیادت سے متعلق مزید تفصیلات بھی سامنے آنے کا امکان ہے۔
