برطانوی وزیراعظم اینڈی برنہم نے کہا ہے کہ برطانیہ میں واقع امریکی استعمال کے فوجی اڈے RAF Fairford کے قریب پیش آنے والے سکیورٹی واقعے میں ایران کے ممکنہ کردار کے “ٹھوس اشارے” موجود ہیں، تاہم تحقیقات ابھی جاری ہیں۔
برطانوی میڈیا کو انٹرویو دیتے ہوئے اینڈی برنہم نے بتایا کہ واقعے کی تحقیقات امریکا کے ساتھ مل کر کی جا رہی ہیں، لیکن انہوں نے مزید تفصیلات فراہم کرنے سے گریز کیا۔ برطانوی حکام کے مطابق پانچ افراد کو مشتبہ سرگرمیوں کے الزام میں گرفتار کیا گیا تھا، تاہم بعد میں انہیں ضمانت پر رہا کر دیا گیا جبکہ تفتیش جاری ہے۔
دوسری جانب ایرانی وزیر خارجہ عباس عراقچی نے برطانوی وزیراعظم کے الزامات کو مسترد کرتے ہوئے کہا کہ ایران کا اس واقعے سے کوئی تعلق نہیں۔ انہوں نے سوشل میڈیا بیان میں کہا کہ غیرملکی ریاستوں کے لیے کام کرنے والے مبینہ افراد کی رہائی خود کئی سوالات کو جنم دیتی ہے اور برطانیہ “غلط سمت میں جا رہا ہے”۔
واضح رہے کہ RAF Fairford برطانیہ کا ایک اہم فوجی اڈہ ہے، جسے امریکی فضائیہ بھی مختلف آپریشنز کے لیے استعمال کرتی رہی ہے۔ حالیہ واقعے کے بعد برطانیہ اور امریکا مشترکہ طور پر اس بات کا جائزہ لے رہے ہیں کہ آیا اس معاملے میں کسی غیرملکی ریاست یا اس سے منسلک عناصر کا کردار موجود تھا یا نہیں۔
