فرانسیسی فوج کے ترجمان نے کہا ہے کہ یورپی یونین کے بحیرۂ احمر مشن میں شامل ایک فرانسیسی جنگی جہاز نے گزشتہ ایک ہفتے کے دوران تقریباً 10 بحری جہازوں کو آبنائے باب المندب سے بحفاظت گزرنے میں مدد فراہم کی۔

فرانسیسی فوج کے ترجمان زیویئر ریول کے مطابق فرانسیسی جنگی جہاز نے بحیرۂ احمر میں تجارتی جہازوں کی محفوظ نقل و حرکت میں معاونت فراہم کی، جہاں خطے کی کشیدہ صورتحال کے باعث بحری جہازوں کو سکیورٹی خدشات کا سامنا ہے۔

انہوں نے مزید بتایا کہ فرانس توانائی کے بنیادی ڈھانچے کی سکیورٹی سے متعلق عسکری مشن کے تقاضوں پر اپنے سعودی شراکت داروں کے ساتھ مسلسل رابطے میں ہے اور اس حوالے سے مختلف معاملات طے کیے جا رہے ہیں۔

باب المندب بحیرۂ احمر کو خلیج عدن سے ملانے والا اہم بحری راستہ ہے، جس کے ذریعے عالمی تجارت اور توانائی کی ترسیل کا ایک بڑا حصہ گزرتا ہے۔ خطے میں بڑھتی ہوئی کشیدگی کے باعث اس راستے کی سکیورٹی بین الاقوامی سطح پر اہم معاملہ بن چکی ہے۔