آذربائیجان کے شہر باکو میں واقع باکو اسٹیٹ یونیورسٹی آف لینگویجز میں معروف پاکستانی دانشور اور مصنف قاسم علی شاہ کی کتاب ’’منزل ہے میرے لیے‘‘ کے آذربائیجانی زبان میں ترجمے کی تقریبِ رونمائی منعقد ہوئی، جس کے ساتھ فوٹوگرافی کی نمائش کا بھی اہتمام کیا گیا۔
اس تقریب میں پاکستان کی جانب سے معروف مصنف قاسم علی شاہ،محترمہ وجیہہ قمر صاحبہ منسٹر فیڈرل ایجوکیشن ، پاکستان کے سفیر جناب قاسم محی الدین، اینکر پرسن عرفان بشیر اور فلائی ایس کے سی ای او عبدالرحمٰن سمیت دیگر معزز شخصیات نے شرکت کی۔
آذربائیجان کی جانب سے ملی مجلس کے اراکین، پاکستان میں آذربائیجان کے سابق سفیر اور دیگر اہم حکومتی و سیاسی شخصیات نے تقریب میں شرکت کرکے پاکستان اور آذربائیجان کے درمیان دوستانہ تعلقات کو مزید مضبوط بنانے کے عزم کا اظہار کیا۔
یہ تقریب دونوں برادر ممالک کے درمیان ادبی، ثقافتی اور فکری روابط کے فروغ کی جانب ایک اہم پیش رفت ہے۔ قاسم علی شاہ کی کتاب کا آذربائیجانی زبان میں ترجمہ دونوں ممالک کے عوام کو ایک دوسرے کے خیالات، اقدار اور معاشرتی تجربات سے روشناس کرانے میں اہم کردار ادا کرے گا۔
اس موقع پر پاکستان کے سفارت خانے کی جانب سے دونوں ممالک کے تعلقات کو فروغ دینے کے لیے کی جانے والی کوششیں بھی قابلِ ذکر رہیں۔ تقریب کے اختتام پر شرکاء کے درمیان فوٹو سیشن ہوا اور مہمانوں کے لیے پرتکلف ضیافت کا اہتمام بھی کیا گیا۔
بلاشبہ، ایسے ادبی اور ثقافتی اقدامات پاکستان اور آذربائیجان کی دیرینہ دوستی کو نئی جہتیں دینے اور دونوں قوموں کو مزید قریب لانے میں اہم کردار ادا کرتے ہیں۔ یہ تقریب دونوں ممالک کے درمیان محبت، باہمی احترام اور مشترکہ مستقبل کے عزم کی ایک خوبصورت مثال ہے۔
