اسلام آباد (ویب ڈیسک): وزیراعظم شہباز شریف نے ایک بار پھر پاکستان تحریک انصاف کو مذاکرات کی پیشکش کرتے ہوئے کہا ہے کہ اگر پی ٹی آئی لانگ مارچ اور دھرنے ختم کرے تو حکومت بات چیت کے لیے تیار ہے۔
وزیراعظم شہباز شریف کا کہنا تھا کہ تحریک انصاف ہوش کے ناخن لے اور احتجاج، لانگ مارچ اور دھرنے ختم کرے، اس کے بعد حکومت بیٹھ کر بات کرنے کے لیے تیار ہے۔
انہوں نے کہا کہ حکومت ملک میں سیاسی استحکام اور امن چاہتی ہے اور مسائل کا حل مذاکرات کے ذریعے نکالا جا سکتا ہے۔
وزیراعظم کی جانب سے مذاکرات کی یہ پیشکش ایک ایسے وقت میں سامنے آئی ہے جب حکومت اور تحریک انصاف کے درمیان سیاسی اختلافات کے ساتھ ساتھ خیبرپختونخوا کی صورتحال اور دہشتگردی کے خلاف حکمت عملی بھی اہم موضوعات بنے ہوئے ہیں۔
دوسری جانب تحریک انصاف بھی متعدد مواقع پر مذاکرات کے لیے آمادگی ظاہر کرچکی ہے، تاہم فریقین کے درمیان مذاکرات کے لیے شرائط اور طریقہ کار پر اختلافات برقرار ہیں۔
