پرتگال کے عالمی شہرت یافتہ فٹبال اسٹار کرسٹیانو رونالڈو نے قومی ٹیم کا تربیتی کیمپ چھوڑنے کے معاملے پر خاموشی توڑتے ہوئے انٹرنیشنل فٹبال سے ریٹائرمنٹ نہ لینے کا اعلان کردیا۔
رونالڈو کے پرتگال کی قومی ٹیم کے ہیڈ کوچ جارج جیسس کے ساتھ مبینہ اختلافات کی خبریں سامنے آنے کے بعد ان کے قومی ٹیم سے مستقبل کے حوالے سے مختلف قیاس آرائیاں کی جارہی تھیں۔
رپورٹس کے مطابق نیشنز لیگ میں ناروے کے خلاف میچ کے دوران رونالڈو نے وارم اپ بھی کیا، تاہم انہیں میدان میں نہیں اتارا گیا۔ بعد ازاں جب انہیں معلوم ہوا کہ ڈنمارک کے خلاف میچ کی ابتدائی الیون میں بھی ان کا نام شامل نہیں تو وہ ناراض ہوکر پرتگال کے تربیتی کیمپ سے چلے گئے۔
رونالڈو کے کیمپ چھوڑنے کے بعد پرتگال کی ٹیم کی جانب سے ان کی مشہور 7 نمبر کی جرسی فوری طور پر ایک اور کھلاڑی کو دے دی گئی، جس کے بعد رونالڈو کے مداحوں میں تشویش پیدا ہوگئی۔
صورتحال کے دوران پرتگال کے کوچ جارج جیسس نے کہا تھا کہ اگر رونالڈو قومی ٹیم میں واپس آنا چاہتے ہیں تو ان کا خیرمقدم کیا جائے گا۔
ان واقعات کے بعد یہ قیاس آرائیاں زور پکڑ گئی تھیں کہ رونالڈو شاید پرتگال کی قومی ٹیم سے مستقل طور پر علیحدگی اختیار کرنے والے ہیں۔
تاہم کرسٹیانو رونالڈو نے سوشل میڈیا پر جاری کیے گئے ایک تفصیلی پیغام میں ان قیاس آرائیوں کا جواب دیتے ہوئے واضح کیا کہ وہ پرتگال کی قومی ٹیم سے ریٹائرمنٹ نہیں لے رہے۔
رونالڈو کے اس بیان کے بعد ان کے مداحوں کی جانب سے بھی اطمینان کا اظہار کیا جارہا ہے، جبکہ قومی ٹیم کے ساتھ ان کے مستقبل سے متعلق صورتحال بھی واضح ہوگئی ہے۔
