انسٹاگرام صارفین کے لیے ایک ایسے نئے فیچر کی آزمائش کر رہا ہے جو سوشل میڈیا استعمال کرنے کے انداز کو کافی حد تک تبدیل کرسکتا ہے۔
میٹا کی زیرِ ملکیت فوٹو اور ویڈیو شیئرنگ ایپ انسٹاگرام میں ’ریڈ اونلی موڈ‘ (Read-Only Mode) نامی ایک نئے فیچر کی آزمائش کی جارہی ہے۔
ایک رپورٹ کے مطابق اس فیچر کے ذریعے صارف انسٹاگرام پر موجود مختلف مواد دیکھ اور براؤز تو کرسکے گا، تاہم پلیٹ فارم پر عام طور پر کیے جانے والے کئی انٹرایکشنز دستیاب نہیں ہوں گے۔
رپورٹ کے مطابق ریڈ اونلی موڈ فعال ہونے کی صورت میں صارف لائیک، کمنٹ، میسج، فالو کرنے یا اسٹوریز دیکھنے جیسے بنیادی فیچرز استعمال نہیں کرسکے گا۔
یعنی صارف دوسرے لوگوں کی پوسٹس اور مواد دیکھنے تک محدود رہے گا اور انسٹاگرام پر اپنی سرگرمی کے ذریعے کسی قسم کا واضح ڈیجیٹل فٹ پرنٹ نہیں چھوڑ سکے گا۔
یہ فیچر کسی حد تک انکوگنیٹو موڈ سے مشابہ معلوم ہوتا ہے، تاہم دونوں کا مقصد اور طریقہ کار مکمل طور پر ایک جیسا ہونا ضروری نہیں۔
رپورٹ میں دعویٰ کیا گیا ہے کہ ریڈ اونلی موڈ ممکنہ طور پر انسٹاگرام کی ماہانہ فیس پر مبنی سبسکرپشن سروس انسٹاگرام پلس کے صارفین کے لیے دستیاب ہوسکتا ہے۔
تاہم اس حوالے سے ابھی حتمی فیصلہ سامنے نہیں آیا اور یہ بھی واضح نہیں کہ مستقبل میں یہ فیچر تمام صارفین کے لیے متعارف کرایا جائے گا یا صرف مخصوص صارفین تک محدود رکھا جائے گا۔
انسٹاگرام کے ترجمان نے تصدیق کی ہے کہ ریڈ اونلی موڈ کی کمپنی کے اندر آزمائش کی جارہی ہے، تاہم فی الحال یہ فیچر عام صارفین کے لیے دستیاب نہیں۔
ترجمان کے مطابق کمپنی اکثر نئے فیچرز اور آئیڈیاز کی آزمائش کرتی رہتی ہے، اس لیے اس مرحلے پر یہ کہنا مشکل ہے کہ ریڈ اونلی موڈ کو باقاعدہ طور پر صارفین کے لیے متعارف کرایا جائے گا یا نہیں۔
اگر یہ فیچر مستقبل میں متعارف ہوتا ہے تو ان صارفین کے لیے خاصا دلچسپ ہوسکتا ہے جو انسٹاگرام پر دوسروں کا مواد دیکھنا چاہتے ہیں لیکن خود کسی پوسٹ یا پروفائل کے ساتھ تعامل نہیں کرنا چاہتے۔
