پاکستان کرکٹ ٹیم کے سابق کپتان اور معروف آل راؤنڈر شاہد آفریدی نے کہا ہے کہ انسان کی پہچان اس کی باتوں کے بجائے اس کے عمل سے ہونی چاہیے۔ انہوں نے برطانوی مسلم کمیونٹی کو پیغام دیتے ہوئے اچھے اخلاق، خوش رہنے اور اسلامی تعلیمات کے مطابق رویہ اختیار کرنے کی تلقین بھی کی۔

شاہد آفریدی نے یہ گفتگو اسلام چینل بزنس ایوارڈز 2026 کے موقع پر کی، جہاں ان سے مسلم کمیونٹی کو ایک دوسرے کے قریب لانے کے وژن کے بارے میں سوال کیا گیا۔ شاہد آفریدی برانڈ وحدہ (Wahda) کے سفیر ہیں، جو عالمی مسلم کمیونٹی کو ایک پلیٹ فارم پر اکٹھا کرنے کے مقصد کے ساتھ کام کر رہا ہے۔

شاہد

برانڈ کے وژن سے متعلق سوال پر شاہد آفریدی نے کہا کہ انہیں یہ سوچ اچھی لگی کہ مسلم امہ کو ایک جگہ جمع کرنے کی کوشش کی جا رہی ہے۔ ان کے مطابق، بدقسمتی سے مسلمان اس وقت متحد نہیں ہیں، اسی لیے وہ اس مقصد کی حمایت کرنا چاہتے ہیں۔

برطانوی مسلم کمیونٹی کو پیغام دیتے ہوئے سابق کپتان نے کہا کہ خوش رہیں، اپنا خیال رکھیں اور اپنے رویے سے ظاہر کریں کہ آپ حضور اکرم ﷺ کے امتی ہیں۔ ان کے مطابق، انسان کے اخلاق اور طرزِ عمل سے اس کی شخصیت اور اقدار کی عکاسی ہونی چاہیے۔

شاہد آفریدی کا یہ پیغام اس بات پر زور دیتا ہے کہ معاشرے میں اتحاد، احترام اور اچھے اخلاق کو فروغ دینے کے لیے صرف دعوے کافی نہیں، بلکہ عملی زندگی میں بھی ان اقدار کو اپنانا ضروری ہے۔