کراچی: 10 روپے کے بینک نوٹ کی بندش اور اسے تبدیل کرانے کی آخری تاریخ سے متعلق سوشل میڈیا پر گردش کرنے والی خبروں کی اسٹیٹ بینک آف پاکستان نے تردید کردی ہے۔
اسٹیٹ بینک آف پاکستان کے مطابق سوشل میڈیا پر 10 روپے مالیت کے بینک نوٹ کو بند کرنے اور اسے تبدیل کرانے کے لیے آخری تاریخ مقرر کیے جانے سے متعلق رپورٹس بے بنیاد اور حقائق کے منافی ہیں۔
مرکزی بینک نے واضح کیا ہے کہ فی الحال کسی بھی مالیت کے موجودہ کرنسی نوٹ کو بند یا تبدیل کرنے کا کوئی حتمی فیصلہ نہیں کیا گیا۔
اسٹیٹ بینک کے مطابق نئی بینک نوٹ سیریز متعارف کرانے کی ایک تجویز پیش کی گئی ہے، تاہم یہ تجویز اس وقت وفاقی کابینہ کے زیرِ غور ہے۔ اس تجویز پر غور جاری ہے اور اسے کسی موجودہ نوٹ کو فوری طور پر بند کرنے کے فیصلے سے تعبیر نہیں کیا جا سکتا۔
