پاکستان کے جارح مزاج اوپنر فخر زمان کو 2026 کی ابوظہبی ٹی10 لیگ کے لیے نئی فرنچائز یونائیٹڈ ٹائیگرز نے سائن کرلیا ہے۔

فرنچائز نے سوشل میڈیا پر جاری کی گئی پوسٹ کے ذریعے فخر زمان کو 2026 کے سیزن کے لیے اپنا آئیکون پلیئر بنانے کی تصدیق کی ہے۔

فخر زمان کی شمولیت سے یونائیٹڈ ٹائیگرز کو تجربہ کار پاکستانی بیٹر کی خدمات حاصل ہوگئی ہیں۔ وہ دنیا بھر میں مختلف ٹی20 فرنچائز لیگز کھیلنے کا وسیع تجربہ رکھتے ہیں اور مختصر فارمیٹ میں جارحانہ بیٹنگ کے لیے شہرت رکھتے ہیں۔

فخر زمان پاکستان کی جانب سے اب تک 3 ٹیسٹ، 92 ون ڈے انٹرنیشنل اور 120 ٹی20 انٹرنیشنل میچز کھیل چکے ہیں۔

ابوظہبی ٹی10 لیگ میں نئی فرنچائزز کی آمد

رواں سال ابوظہبی ٹی10 لیگ کے ڈھانچے میں نمایاں تبدیلیاں کی گئی ہیں۔ ٹیموں اور فرنچائز ملکیت کے لیے بولی کا عمل شروع کیا گیا، جس کے نتیجے میں نئی فرنچائزز بھی لیگ کا حصہ بنی ہیں۔

ابوظہبی کرکٹ اینڈ اسپورٹس ہب نے لیگ کے اکثریتی ملکیتی اور کمرشل حقوق سنبھال لیے ہیں۔

7 نومبر سے ایکشن شروع ہوگا

2026 کی ابوظہبی ٹی10 لیگ 7 سے 20 نومبر تک زاید کرکٹ اسٹیڈیم میں کھیلی جائے گی، جس میں 8 ٹیمیں حصہ لیں گی۔

نئے ڈھانچے کے تحت لیگ ایک نئے مرحلے میں داخل ہو رہی ہے اور فرنچائزز نے اپنے اسکواڈز کی تشکیل بھی شروع کردی ہے۔

فخر زمان کی یونائیٹڈ ٹائیگرز میں شمولیت کے بعد شائقین کی توجہ اس بات پر ہوگی کہ پاکستانی اسٹار بیٹر ٹی10 کے تیز رفتار فارمیٹ میں اپنی جارحانہ بیٹنگ سے ٹیم کے لیے کیا کردار ادا کرتے ہیں۔