Helga Duffy
برطانیہ میں مقیم 99 سالہ ہیلگا ڈفی نے ایسا کارنامہ انجام دیا ہے جس نے سب کو حیران کردیا۔ انہوں نے طیارے کے پروں پر پرواز کے دوران ونگ واکنگ کرکے دنیا کی معمر ترین خاتون ونگ واکر کا عالمی ریکارڈ اپنے نام کرلیا۔
گنیز ورلڈ ریکارڈز کے مطابق ہیلگا ڈفی نے 16 اکتوبر 2026 کو برطانیہ کے علاقے سرینسیسٹر میں واقع آر ایف سی رینڈکومب ایئر فیلڈ پر یہ کارنامہ انجام دیا۔ اس وقت ان کی عمر 99 سال اور 21 دن تھی۔
ریکارڈ بنانے کے ساتھ فلاحی کام بھی
ہیلگا ڈفی نے یہ غیر معمولی کارنامہ صرف عالمی ریکارڈ قائم کرنے کے لیے نہیں کیا بلکہ اس کے ذریعے ولٹ شائر اور باتھ ایئر ایمبولینس کے لیے بھی چندہ جمع کیا۔ رپورٹس کے مطابق اس کوشش سے 1,300 برطانوی پاؤنڈ سے زیادہ رقم جمع ہوئی۔
ہیلگا نے بتایا کہ انہیں اس کام کا خیال 97 سالہ بیٹی برومیج کو دیکھ کر آیا، جنہوں نے اگست 2026 میں ونگ واکنگ کا عالمی ریکارڈ قائم کیا تھا۔ ہیلگا نے بھی اس چیلنج کو قبول کیا اور اب وہ خود عالمی ریکارڈ کی مالک بن گئی ہیں۔
سابق ریکارڈ ہولڈر نے کیا کہا؟
ہیلگا ڈفی کی کامیابی کے بعد بیٹی برومیج نے انہیں مبارک باد دی، لیکن ساتھ ہی دلچسپ اعلان بھی کردیا۔ ان کا کہنا تھا کہ وہ 100 سال کی عمر میں دوبارہ ونگ واکنگ کرکے اپنا ریکارڈ واپس لینے کی کوشش کریں گی۔
یوں 99 سالہ ہیلگا ڈفی کی کامیابی کے بعد اب سب کی نظریں بیٹی برومیج کے اگلے اقدام پر ہیں۔
ہیلگا ڈفی کو گنیز ورلڈ ریکارڈز کی جانب سے اس کامیابی کا سرٹیفکیٹ بھی دیا گیا۔ ان کا یہ کارنامہ اس بات کی مثال ہے کہ غیر معمولی کامیابیاں حاصل کرنے کے لیے عمر ہمیشہ رکاوٹ نہیں بنتی۔
