واٹس ایپ نے کالنگ کی سہولت کو مزید آسان بنانے کے لیے ایک اہم فیچر متعارف کرایا ہے، جس کے ذریعے ایسے افراد بھی کال میں شامل ہوسکیں گے جن کا واٹس ایپ پر اکاؤنٹ موجود نہیں۔
کمپنی کی بلاگ پوسٹ کے مطابق صارفین اب کال لنک شیئر کرکے اپنے دوستوں، رشتہ داروں اور دیگر افراد کو گفتگو میں شامل کرسکتے ہیں۔ لنک موصول کرنے والے افراد ویب براؤزر کے ذریعے کال میں شرکت کرسکیں گے۔
یہ سہولت انفرادی اور گروپ، دونوں طرح کی کالز کے لیے دستیاب ہوگی، جبکہ ایک کال میں بیک وقت 32 افراد شرکت کرسکیں گے۔
واٹس ایپ کالز کے نئے فیچر میں کیا خاص ہے؟
واٹس ایپ کے مطابق کال لنک کے ذریعے شامل ہونے والے افراد کی گفتگو کو بھی اینڈ ٹو اینڈ انکرپشن کا تحفظ حاصل ہوگا۔
اس کے علاوہ کال میں ہاتھ اٹھانے، اسکرین شیئر کرنے اور دیگر بنیادی سہولیات سے بھی فائدہ اٹھایا جاسکے گا۔
کمپنی کے مطابق یہ کالز مفت ہوں گی اور ان کے دورانیے پر کوئی مقررہ حد نہیں ہوگی، جس سے صارفین طویل گفتگو اور آن لائن ملاقاتیں آسانی سے کرسکیں گے۔
واٹس ایپ کال لنک کیسے بنایا جائے؟
واٹس ایپ پر کال لنک بنانے کے لیے ان آسان مراحل پر عمل کریں:
- اپنے موبائل میں واٹس ایپ کھولیں۔
- Calls کے ٹیب میں جائیں۔
- پلس (+) کے آئیکون پر کلک کریں۔
- کال لنک بنانے کا آپشن منتخب کریں۔
- تیار ہونے والا لنک اپنے دوستوں یا دیگر افراد کے ساتھ شیئر کردیں۔
لنک موصول کرنے والے افراد اسے کمپیوٹر کے ویب براؤزر میں کھول کر اپنا نام درج کرسکیں گے۔ اس کے بعد میزبان کی اجازت سے وہ کال میں شامل ہوسکیں گے۔
یاد رہے کہ کال لنک بنانے کے لیے واٹس ایپ اکاؤنٹ ضروری ہے، تاہم لنک کے ذریعے کال میں شامل ہونے والے شخص کے لیے اکاؤنٹ ہونا لازمی نہیں۔
گوگل کیلنڈر اور آؤٹ لک سے بھی رابطے کی سہولت
واٹس ایپ کے مطابق مستقبل میں کال لنکس کو گوگل کیلنڈر اور مائیکروسافٹ آؤٹ لک کے ساتھ مربوط کرنے کی سہولت بھی فراہم کی جائے گی۔ اس سے صارفین کے لیے میٹنگز اور آن لائن گفتگو کا شیڈول بنانا مزید آسان ہوسکے گا۔
اس نئے فیچر کے ذریعے واٹس ایپ ایسے افراد کو بھی کال میں شامل ہونے کا موقع فراہم کرے گا جو عام طور پر اس پلیٹ فارم کا استعمال نہیں کرتے۔
